Напярэдадні важнай палітычнай падзеі – выбараў Прэзідэнта Рэспублікі Беларусь, якія прызначаны на 26 студзеня, на Дзятлаўшчыне прадаўжаецца інфармацыйная акцыя “Усё пра выбары”. У яе ўключыліся прадстаўнікі ідэалагічнага актыву, члены прафсаюза, грамадскіх арганізацый нашага раёна. На гэты раз актывісты расказалі “Усё пра выбары” жыхарам горада Дзятлава, гарадскіх пасёлкаў Казлоўшчына і Наваельня. Менавіта там праходзілі мерапрыемствы акцыі. Удзельнікі раздавалі прахожым буклеты з інфармацыяй аб парадку правядзення галасавання, графіку работы выбарчых участкаў, кандыдатах у Прэзідэнты.

31 снежня ў дзіцячы дом сямейнага тыпу горада Дзятлава Аляксандра і Марыны Русаўскіх завіталі навагоднія госці. У рамках акцый “Нашы дзеці” і “Прафсаюзы – дзецям” да вялікай сям’і з сюрпрызамі і падарункамі наведаліся старшыні раённых арганізацый Таварыства Чырвонага Крыжа Галіна Касцюк, Беларускага прафсаюза работнікаў адукацыі і навукі Тамара Юранкова, ГА “БРПА” Ірына Мішчанка, яна ж каардынатар дзейнасці раённага валанцёрскага клуба “Мы разам”, а таксама старшыня раённага савета ветэранаў Міхаіл Губар і сакратар аб’яднання Ядвіга Гушча.

26 снежня на Дзятлаўшчыне адбылося ўрачыстае адкрыццё Рэспубліканскай навагодняй дабрачыннай акцыі “Ад усёй душы” з удзелам раённага кіраўніцтва, валанцёраў, прадстаўнікоў грамадскіх арганізацый, працоўных калектываў. Трэці год запар акцыя праходзіць з ініцыятывы Прэзідэнта Аляксандра Лукашэнкі, сёлета яна прадоўжыцца да 15 студзеня.

У Цэнтры сацыяльнага абслугоўвання насельніцтва Дзятлаўскага раёна панавала па-хатняму цёплая і добразычлівая атмасфера. Тут сабраліся дзятлаўчане-пенсіянеры, якія знаходзяцца на надомным абслугоўванні, і тыя, хто наведвае аддзяленне дзённага знаходжання для людзей залатога ўзросту.

– Дарыць дабрыню і цяпло сэрцаў пажылым людзям заўжды правільна, асабліва гэта важна ў час святаў, – павіншаваў прысутных намеснік старшыні райвыканкама, старшыня раённай арганізацыі РГА “Белая Русь” Вадзім Бялятка. – Акцыя “Ад усёй душы” заклікана ахінуць увагай усіх пажылых людзей Дзятлаўшчыны і Беларусі ў цэлым. Яна завітае ў сацыяльныя аддзяленні, пансіянаты, бальніцы сястрынскага догляду, аднак важна, каб яна пабывала і ў аддаленых вёсках, бо пачуць цёплыя словы для адзінокіх людзей – гэта шчасце. Ад райвыканкама, раённага Савета дэпутатаў і мяне асабіста прыміце віншаванні з пачаткам акцыі і святамі, моцнага вам здароўя, міру, дабрабыту і каб у гэтыя чароўныя дні вашы мары ажыццявіліся.

На пачатку школьных канікулаў у межах дабрачыннай акцыі “Нашы дзеці” ў раённым Цэнтры культуры і народнай творчасці адбылося вялікае навагодняе свята для навучэнцаў школ з удзелам кіраўніцтва Дзятлаўшчыны. Запрашэнне на раённую ёлку атрымалі школьнікі, якія вызначыліся высокімі вынікамі ў вучобе і навуковай дзейнасці, спорце, мастацтве, хлопчыкі і дзяўчынкі з прыёмных і апякунскіх і шматдзетных сем’яў, дзеці з абмежаванымі магчымасцямі, выхаванцы сацыяльна-педагагічнага цэнтра.